Anders Vik bur i Knarvik og tevalar for AKS-77. Han har delteke i Strandebarm tidlegare. Faren er Erlend Vik, og besteforeldra er Oddfrid og Hans Gunnar Vik på Berge i Strandebarm. 
Denne kvelden tok Anders turen til Strandebarm igjen, og sette ny personleg rekord og ny banerekord med eit kast på 56,14 med 1750g-diskosen. Han er med det nummer 2 på noregsstatistikken i klassen sin. SIL gratulerar med eit flott resultat. Anders er også medisinstudent i tillegg til friidrettssatsinga.

Det var størst deltaking blant rekruttane, og dei deltok med stor innsats i 60m og lengde, og hadde det kjekt.
Kvam LSK deltok med tre utøvarar; Oline Gjerdevik, Line Bergan Øvsthus i 10-årsklassen og Jenny Gjerdevik i 13-årsklassen. Dei deltok både både i lengde, spyd og 60m og gjorde det godt. Det vart også eit tremannsfelt på 3000m. Erlend Drivenes MS frå Tørvikbygd IL vann feltet på 9,57,91. Bak kom ungguten Ådne Kjosås G15 frå Øystese. Han representerer IL Norna-Salhus, og kom i mål på 11,19,46. Like bak kom Strandebarms eigen Ove Måge MV45-49.   

Tiliah Kvitastein Wilhelmsen J10 var einaste deltakar på 600m. Ho kom inn på tida 2,34,87, som er ei kjempegod tid når ein spring åleine. Det er berre 1,5 sekund bak tida som ho vann Friidrettsfestivalen på i sommar, då ho sprang i eit felt saman med fleire andre deltakar frå Bergen og Voss.

Det var også mykje publikum denne onsdagskvelden, som kosa seg i finveret. Kiosken var sjølvsagt open, og det var ei fin seinsommarkveld på Idrettsparken. Neste stemne er onsdag 21. september. Då vert det deltakarmedaljar til alle. Friidrettstreningane går elles fast kvar onsdag kl 18 for 1. klasse og oppetter.