Monica Rinde Oma fotografert på eit tidlegare løp i Vinterkarusellen. Foto: Kondis

Folk var glade for igjen å kunne kome saman og trimme i hyggjeleg selskap. Føret var upåklageleg, med bàre vegar. Litt regn var det, men langt frå noko ausregn, sjølv om løparane var godt våte ved målgang. Folk tok det i sitt eige tempo, og humøret var på topp. Nokon sprang, andre gjekk åleine eller saman med slekt eller vener. Her er alle vinnarar uansett ambisjonar. Mange born var med og kom seg igjennom den fire kilometer lange løypa på imponerande vis, fleire av dei med mor, far, eller med bestemor eller bestefar med.

Av kvinnene var Monica Rinde Oma fyrst inne på 19,28. Dei neste var unge Lisa Svåsand Mundheim, Irene Myrvold og Liv Berit Bru Eide. Nokre spurtoppgjer vart det også, m.a. mellom brødrene Lars og Ove Måge, der fyrstnemnde trakk det lengste strået og kom inn på 15,34, eitt sekund føre Ove. Med dette var dei blant dei fremste i mål. Fyrst av alle var Håkon Myklebust Skjelnes frå Rosendal Turnlag med anar frå Torgjersbruket på Risa Han sprang i mål på solide 13,52. To unggutar frå Norheimsund kom etterpå; Jarand Valland og Viljar Berge Eide spurta hart dei siste hundre metrane, der Jarand passerte mållina like før Viljar. Men dei vart vart begge klokka inn på 14,16. Det var kjempeflotte løp frå dei to unge gutane! Alt i alt vart det igjen ein kjekk trimkveld på Idrettsparken, med mange blide andlet. 

Etter løpet var det trekking av fem gåvepremiar blant dei som deltok på løpet. Den gjevaste premien vart trekt til slutt. Det var eit gåvekort på kr. 500,- til bruk på Mo Sport i Norheimsund. Vinnar vart Frode Espeland frå Oma. Han er fast deltakar på Vinterkarusellen og gjorde eit nytt flott løp denne kvelden. Gratulerar til Frode!  Dette var det fjerde løpet som vert arrangert denne sesongen, men skulle eigentleg vore det sjette løpet. No er det to løp att; tysdag 15. februar og 8.mars. Me vonar desse kan gå som planlagt. Skulle det kome endringar, vert det godt kunngjort på førehand. 

Resultat Vinterkarusellen 25. januar 2022.